يا اخوان ..هل هذا الكلام صحيح .

علمنا كم الموديل اقل شيء

يعني ماهو معقولة مثلا موديل 2000 توديه الوكالة لانهم بيأخذون قيمة السيارة كامله منك

و الوكالة اللي اعرفه ما تصلح تغير فقط

يعني تجيهم عندك عطل معين يتصلح ما يصلحونه يغيرون القطعه كامله من جيبك

ووش الصوت بالضبط يعني

في منتج من شركة ليكوي مولي تحطه مع الزيت ويختفي ان شاء الله

الصبابات هي تكايات البلوف غيرها وغير طرمبة الزيت لان اسباب تعطل الصبابات دفع طرمبة الزيت ضعيف ف غيرها واستخدم زيت موتر كرافت 10₩30 لا تحط ثقيل نهائي

للمعلوميه التكايات ماتتغير الا اذا صوتها عاليه بحيث اذا دعست بنزين يزيد الصوت هنا لازم تتغير اما اذا بس عند التشغيل وبعدها يختفي الامر عادي بس غير نوع الزيت المستخدم

الله يعطيكم العافيه...
الصوت طالع من جنب المكينه الايمن والكثير اكد لي انه صبابات
والصوت مستمر .
هالحين انا قررت اروح الورشه لكن انا والله  متخوف من هالورش
يا اخوان اللي ينصح لي بورشه متخصصه بالامريكي ياخذ اجري .

طيب دام انهم اكدو انه تكايات غير معها طرمبة الزيت ضروري لان ممكن كل المشكلة من دفع طرمبة الزيت ضعيف ولا مصفاتها منسده ف اهم شي عندك طرمبة الزيت وخلك على زيت خفيف وان شاء الله اخر الاعطال

لكن انا ما افك ولا اربط...اكيد ابروح للورشه وانا مشكلتي وخوفي كله 
يجي من الورشه وانا خايف اطيح لي بعليمي والا حرامي .
انا ماني بخيص بالورش وهذا اللي خلاني اجي ادور المشوره .
لكن اذا لقيت ورشه صح ومتخصصه انحلت مشكلتي وصار دفع
الفلوس بمحله .

مديل موترك كم لو موترك مديل حديث كلمني اطلع لك من شركة الجميح بخصم ممتاز

الله ايعافيك ..
الموتر ماهوحديث ولا قديم  م ١٢ ولااعتقد ان الصبابات توصلني 
للوكاله .
اكيد ورشه محترمه تكفي.. لكن من يدلنا عليها .

فيه بعض الوكالات ماهم امينين ما عندهم لا ذمة و لا ضمير 

انا مريت في موقف صار لي مع وكالة نيسان البحرين كنت مدخل سيارتي حق تشييك بس و علشان موديلها قديم 2003  طلعولي فيها

بلاوي أشياء يعني خللوا سيارتي ما تسوى هللة.  ومن رجعت الشرقية دخلتها بنشري اتعامل معاه و الفحص الدوري و اثنينهم قالولي

مافي شي.   انت دور لك ابن الحلال اللي يشتغل بذمة و هذا يبان اول ما تدخل اذا شفته حايس في السيارة يحك راْسه هذا انا اقول لك 

اطبق كبوتك واطلع من عنده بس لا تطول شوف غيره. 

يا راعي الموضوع احذف ردي لو تكرمت شكلي باكل ديسلايكات كثير

انا ايش اللي دخلني ذَا المنتدى ليتني ما عرفت لا حراج ولا منتداه 

والله ياخوي اني حاولت احذف ردّك لكني  ماقدرت  ....المعذره .

اذا انت من سكان الرياض يمدحون ورشة النافع صناعية الشفاء تخصصه جموس وامريكي بشكل عام وفورد وكذا


للأمانة انا ماقد اشتغلت عنده شي كبير اللهم مرة دخلنا موتر لنسيبي حق الحكومة يعني اصلاحات خفيفة لكن واضح على الورشة انها شغل ثقيل منظمة واللي يشرف عليهم شايب سعودي له تقريباً 25 سنة اظاهر ماشاء الله في مجال الميكانيكا وتعامله راقي وفاهم ولا يحب يتفلسف ولا يقولك غير كذا يقولك خل عندي ونتأكد ونشوف ومالك هم


رقم الرجال 0553366635 اسمه ابو ابراهيم كلمه منتاب خسران شي واعرض عليه الموتر اقتنعت ولا خله


وفيه ورشة ثانية بعد اسمها مشعل العتيبي في الصناعية القديمة برضوه تخصص امريكي وجموس

مشكور يا براهيم ..
لكن انا من سكان بريده والى الان ما حصلت احدي يفيدني .

ورشة الحربي طريق عنيزة
.. يمدحون ها الورشة

اخوي ..
تقصد اللي بصناعية الرشودي

اخوي بدر الله يكون بعونك بخصوص الديسلايكات الغير منطقية والغير مبررة  واتمنى من اصحاب منتدى حراج اعادة وضع النقاط وطرق اكتسابها او فقدانها وتغيير بعض الشروط  لتجنب ما حدث مع بعض الأعضاء  وهي وجهة نظر  والله يوفق الجميع