أضف سؤال أو موضوع جديد          

امتدادا لقصة أبو يزيد قصتي مع شريطي الشفا جمس 1987م

up 34 down 6
أبو سـيـف 214
قبل 4 سنه و 8 شهر



السلام عليكم ورحمة الله وبركاته .

بسم الله الرحمن الرحيم

والصلاة والسلام على أشرف الانبياء والمرسلين نبينا محمد وعلى آله وصحبه وسلم تسليماً الى يوم الدين ..

أما بعد يا أخوان ..

اولا ابو يزيد رجل اثبت انه مترفع عن هذه الاشكال المنتشره عندنا بكثره في مجتمعنا في كل المجالات ..
ولا يحسب الواحد ان " الشريطي " فقط بالمعارض او في مجال السيارات .!!
لا ! بل في كل شي يجي من وراه " فلوس " اهم شي ... مستعد يبيع عياله ويطلق حريمه بسبب بيعه !! لا تسمن ولا تغني من جوع .

والله لا يبلانا باللي بلاهم فيه ..

...


قصتي باختصار شبيهة جداً بقصة اخونا ابو يزيد لكن الفارق هنا في الموضوع هو ( ردة الفعل )
لان الله يهدينا واياكم لكل شخص ردة فعل معينة وحد معين للصبر وانا للاسف ماقدرت اتحمل مثل اخونا ابو يزيد الله يعطيه العافيه ويكثر من امثاله ..

يوم من الايام كلمني واحد من اقاربي قال ابو سيف ابي اطلع للمعارض وابي لي جمس 87 لون احمر مع اسود لان الرجل عاشق لهالموديل فـ حب يعيد الذكريات ههههه
وانا والله نصحته قلت شف تراك بتتعب بالمعارض والمعارض يبيلها وسع صدر وبال وصبر .. قال ابد تم .
وما اخفيكم والله الشاهد ان اشرت عليه انه الافضل ياخذ من موقع او يدور من شخص معين يكون معه جمس شخصي ويبيع له اياه عشان افضل يكون من راسه لراسك وايضا التفاهم يكون فيه مريح ونسبة المصداقية افضل بكثير من المعارض وكذب الشريطية .

لكن بما ان الرجال كان مستعجل فـ قلت له يلا مشينا للمعارض ..

حصلنا جمس بالساحه نفس المواصفات واللون اللي يبيه والممشى 160 ألف ! يعتبر نظيف . وراعيه حاط ورقة عليه بالموديل والممشى ورقم الجوال والسومه .. ( لاحد يتساخف يقولي السومة ولا ادواردو هههه )
المهم ..
الشاهد في الموضوع ان خوينا تحمس واتصل على الرجال وثواني الا والحبيب جاي مستانس وكأن لسان حاله يقول " حصلنا هطف نلعب عليه " ☻ 
انا شفت عيوب بسيطة لكن ماتضر الموتر مرشوش كامل وفيه قطع بسيط بالطبلون وزر الباب اللي داخل مكسور يعني حاجات بسيطة جدا ..
لكن كان همي الزبدة بطن الموتر والجيربوكس والمكينة والشاصي ..

المهم جا وقعدنا نتفاهم وش فيه الموتر ووش مافيه ..
قال ابد موتر جديد ومخزن ومافيه غير اللي شايفته عيونكم رش على نظافة لتجديد اللون واشياء بسيطة بالديكور عداد السرعه مايشتغل وزر الباب وقطع بسيط بالديكور مثل ما انتم شايفين وابد والباقي لايردكم الا الفحص ..
المشكلة ان اللي معي شبه ( هطف ) ههههه
قلنا له يلا نفحص قال بس اول سلموني عربون .. قلت له ياهو ترا محنا طايرين خلنا نفحص الموتر اول وبعدها نستعين بالله ونشتري قال والله ماعليك ان طلع شي عربونك يرجع لك ومن هالكلام ..
انا صراحه رفضت خوينا الله يهديه قدامه قال يابو سيف خلنا نعطيه عربون والرجال عند كلمته ! انا سكتت ! وذاك تشقق وجهه من الابتسامة !
عطاه 500 ريال قال لا العربون 1000 ! 
ناظرني خويي قلت دوس ماعلي انا كمل معه وانا اقول بقلبي خل نشوف وش اخرتها معه ..

مجرد ما استلم الالف ريال تغيير الاسلوب وبدا مسلسل رامبو الفشقه !!
تدرون انا اعتبر انا وولد عمي من هوامير سوق السيارات الحمدلله معي معرض دافع فيه راس مال 5 ملايين وخذ لك من الرخيص لين وقفنا عند محل فحص وهو يسولف قاطعته انا قلت لاهنت يابو فلان انا اعرف محل فحص سوداني متعامل معه .
قال بس هذا كويس ومن ذا الكلام قلت الله لا يهينك والله انا ذاك اعرفه ورجال ماشاءالله عليه ..
وجهه تغيير ويناظرني من المرايه اللي بالوسط قال اللي تشوفه .
رحنا عند خوينا السوداني واول مانزلنا قلت لخويي خل قاعد معه وانا خلني مع السوداني نفحص الموتر مسمار مسمار .
والشريطي قاعد في غيه يفقش ع الرجال ويعطيه من ذا الرخيص 

لين طلع التقرير وكان فيه كالتالي ..

- القير يحتاج توضيب
- تهريب صدر المكينة 
- تهريب صوفة عمود الكردان الخلفية 
-المكينة تكتم وبطء في الاستجابة 
- مساعدات ويايات تجارية وتحتاج تغيير كلها 
- مقصين امامي 
- صوت بالكارونة خفيف 
-عداد الحرارة خربان ثابت بمكانة مايتحرك صامل 

جيت انا ومعي التقرير وفيني ابتسامة وما اكذب عليكم انها كانت ابتسامة شماتة بصراحة لان خلاص الحركات هذي صارت قديمة اني اخذكم بالاسلوب وبأيمان مغلظة لا تفكر فيها بيوم حساب ولا عقاب ..
قلت له خذ الله يحفظك هذا تقرير موترك وهذا مفتاحه والله يسلمك نبي العربون لان طلع اشياء غير الكلام اللي قلته والموتر يبيله نفض من والى ..
فجأة تغيير وجهه وتغيير الاسلوب اصلا هذا نصاب الزول وحسود ونزل على راعي الفحص المسكين من قوة مافيه من غبن ههههه
قلت له الله يهدينا واياك وماحد معصوم من الخطأ وعاد انا ارقع له اقوله يمكن انت ماتدري عن الاشياء ولكن مو مشكلة هذاك اللحين عرفت والله يرزقنا واياك .

قال اتفاقنا معروف قلت وشو ؟ 
قال يرجع نص العربون ! قلت له يارجل قل غيرها هههههه
من جدك تتكلم ؟ في اي قانون جبت هالكلام ومتى قلته واتفقنا معاك فيه اصلا ! قال امش على المعارض كلهم واسألهم وش نظامهم ..
قلت له شف ونا خوك اللحين شوي ويأذن المغرب ورجاءً بكل ادب رجع لنا العربون ولاتخلي الشيطان يدخل بيننا .
والرجال مصرّ وخويي موقف المتفرج منصدم !! مو عارف وش يسوي لانه اول مرة يشوف بعينه مثل هالشي !
وبعد ماخذنا عشر دقايق وحنا نتكلم ع الموضوع هذا قام وطلع الفلوس ورماها في الارض !! 

وصراحه انا هنا ماقدرت امسك نفسي مسكته مع ثوبه وصارخت بوجهه احترم نفسك وتعلم علوم الرجاجيل يارخمه وحلفت مايمشي لين ياخذ الفلوس من الارض ويسلمني اياها بيدي .
ومن قهر مافيني تمنيت ان جلدته جلد لان خلاص هذولي الشريطيه والله اني صرت ما اطيق تصرفاتهم دجل وكذب وحلوف الى مالا نهاية !!

قام وتأدب وخذا الفلوس وتحسبت في وجهه ان الله لا يوفقه في دنيا واخره وينتقم منه ..

من بعدها خويي هون فكرة الجمس وكره عيشة المعارض وصار يشوف الكامري اللي معه جمس وراضي بها هههههههه

..

ومثل ماقال اخونا ابو يزيد خذوا العبرة وتعلموا من الاخطاء 
وازيد فقط نقطة مهمة ..

نصيحة اذا تبي تشتري موتر عليك من اصحابها لا تروح للمعارض الا اخر شي واترك المعارض اخر الحلول لديك .
ابدا من المواقع مثل موقع حراج وغيرها من اصحاب هذا المجال .

لانك راح توفر جهد وعناء وحرق اعصاب وتريح راسك من الكذب والصراخ اللي ماله سنع .


اتمنى اني ما طولت عليكم ..

والله يحفظ الجميع بعينه اللي ماتنام ♥ 










إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


رائع 
هذه المواضيع افضل ما عرض في هذا المنتدى 
الحقوق تنتزع انتزاعاً , ولا تعطى 
أهنيك 


up 11 down 0
ابو فرهود 357
قبل 4 سنه و 8 شهر



وعليكم السلام ورحمة الله
أحسن ما سويت والله يكثر من أمثالك
هذا الاسلوب ينفع مع اللي ياكل حق الناس بالباطل
والمصيبة انهم ماخذينها مصدر دخل ياخذون من كل شخص اقل شي 500 ريال
وهم عارفين ان بضاعتهم فاسدة


up 2 down 0
abu muadi 36
قبل 4 سنه و 8 شهر



للأسف اصبحت بيئة المعارض الا من رحم ربي ( اسلام بلا مسلمين)


up 3 down 0
panamira 1904
قبل 4 سنه و 8 شهر



ياسلام عليك بردت قلبي عداك العيب ياشنب لايك +١


up 1 down 0
benz lover -83
قبل 4 سنه و 8 شهر



وش الجمس حوض ولا سوبر بان ؟؟؟




up 0 down 1
a.ibrahem 3164
قبل 4 سنه و 8 شهر



نظاما 
ماتدفع ولا تاخذ ريال الا بسندات تثبت حقك وحق غيرك
عربون بدون اي شي يثبت
ممكن يسحب عليك ويقولك ما اخذت منك شي فكيف تثبت حقك نظاميا

اما تعطيه عربون بدون اي فالمفروض هذا ميصير واذا ماقبل اتركه 


up 0 down 1
شويخ من أرض مكناس 2823
قبل 4 سنه و 8 شهر



والله انك كفو

الوصخ يبغاك تروح معه المعارض ويجتمعون الشريطية ووقتها تحس بالغبنة وأن حقك ضاع

لكن ليتك جلدته لين عض الأرض حتى يتأدب


up 2 down 0
أبو عبادة 4851
قبل 4 سنه و 8 شهر



ياخي نسأل الله الستر في الدنيا ولاخره
وان لايضعنا في مثل موقف صاحب السياره
حقيقه كارثه ان يبيع الرجل دينه وصدقه
مع الناس من اجل حفنة مال
قد يكون فيها محق بركة ماله وولده
لانه والعياذ بالله
بطريقته هه لايغش نفسه فقط
وانما يغش بيته وولده
فلا اعتقد ان ابن غذي بأحيتال ابيه ونصبه سوف يكون نبتا طيب الا ان يهدي الله

كثير هؤلا الاشكال نراهم وحقيه لا نراهم الا احقر الناس
لا ادع والى الشر وحلمك عليه قد يكافئك الله عليه بما هو افضل
ولكن اسأل ان لايضعني في هذا الموقف
لانني قد اتصرف بمشكله تقودني الى السجن

موضوعك جميل فلعل من يقرا يكون حذر من نصب
من لا يتقى الله في بيع السلعه



up 2 down 0
عبدالله عبود 143
قبل 4 سنه و 8 شهر



والله بيعة السياره حتى صار صعب جدا  تعرفوني اني مسوق اعلانات و اشوف كل شي والله تعبوني ناس كثيرين  مافي سومه جادة كلها كذب  و حتى عرضت سيارة لاندكروزر تبع ابو يزيد الله يوفقه  نشرت اعلانها شهرين و ما انباعت كل السومات كانت كذبة  حسبي الله عليهم بس 


up 0 down 0
fowad 122
قبل 4 سنه و 8 شهر



الحمد لله ان وجد مواقع البيع والشراء تغنيك عن مقابلة الاشكال الخبيثة


up 0 down 0
عربة للسيارات 1664
قبل 4 سنه و 8 شهر



المواقع البيع والشراء كلها نصب في الصور شكل وفي الطبيعة شكل اخر 
بس تخسر في المشاوير رايح جاي 


up 0 down 0
m12221 25
قبل 4 سنه و 8 شهر



بصراحه تصرف الشريطي يقهر وزين انه ماعاند اكثر ولا كان حصل امور لاتحمد عقباها والله يكفينا شر قهر الرجال 



up 1 down 0
كارينو 571
قبل 4 سنه و 8 شهر



يا شيخ و الله أنك رجال بردت قلبي فيه 
حسبي الله عليه عادي يبيع بفلوس حرام يدخلها في بطنه و بطن أم عياله و عياله ؟! 


up 1 down 0
عبدالله خالد 19 368
قبل 4 سنه و 8 شهر



الله لايوفقهم حتى في هالموقع منتشرين ياكثرهم لاتقول مافي شريطية في موقع حراج لاحقينا حتى هنا الله لايكثرهم 



up 1 down 0
rakan424 1
قبل 4 سنه و 8 شهر



حسبنا الله ونعم الوكيل
انا قلت انهم نادرين بالسوق اللي مثل كذا
وطلعوا اثرهم منتشرين
والحمد لله قدرت تاخذ حقك

وانا والله يمكن البعض يقولي مشكلتي طيب شوي
لكن صدقوني الطيبه في موضوعي السابق ما كان لها اي دخل
اللي سويته انا مجرد احترام لشيباته
وهو اللي ما قدر شيباته واستغلها
لكن ان ضاع حقك بالدنيا , فما راح يضيع بالاخره , وش احسن من كذا

وانا والله اشوف اني ما ني كفو , اني اغلط على كبير سن , حتى لو الحق معاي وبصفي وهو الغلطان , فـ احس ماهي رجوله مني , اني اجيب له الشرطه او اسبب له مشكله قدام الناس , حتى لو هو غلطان , لانه كبير بالسن , ومهما كان غلطته , احسها ماتوصل كذا , عشان عربون الف ريال 

ودامها بيحطها بذمتها , فموعدنا عند الله سبحانه , ووش ترجي منه بالله , وبالعكس تطلع مظلوم من الموضوع , افضل بمليون مره , انك تطلع ظالم

والحمد لله طلعنا بمكسب من الموضوع وهو اننا تعلمنا , والمكسب الاكبر , يوم القيامه , راح اخذ حقي منه بس هالمره مو فلوس , راح اخذها حسنات , لين ما ارضى .. 

تسلم على الموضوع الجميل +1



up 5 down 2
ابو يزيد 000 8712
قبل 4 سنه و 8 شهر



الله يزيل هالاشكال  بس ترون والله ماهم كلهم كذا انا كذ 
حجزت هيلكوس بمعرض وسحبت عليه ثلاث ايام وجيته من بعدها حتى مافحصت السياره قلت انا بطلت اشتري السياره 
وقال تم هذا عربونك ولا بغيت سياره ولا شي الله يحييك باي وقت عندي وانا والله ماعرف الرجال ولا شي 


up 1 down 0
غريب الدار١٣٢ 79
قبل 4 سنه و 8 شهر