تفضلووو تجربتي مع مسحية الكفرات ووزن السياره كمبيوتر .
32
6
إضغط هنا للإخفاء
مشكلتي مع وزن الكمبيوتر للأذرعه والمقصات وميلان هيكل السياره. ومسامير عمود التوازن
لسيارتي يوكن slt 2010
قبل فتره غيرت كفرات قودير مقاس ٢٠ وبعد ٨ شهور وكم ممشى منها خارج المدينه وداخلها حسيت فيه اختلاف من الامام فيه مسحيه بسيطه ماتشوفها غير ادقق في الكفر جهة المكينة من داخل. وفيه صوت احياناً اسمعه واحيان يختفي
( اكتشفت لاحقاً ان الصوت من مسامير عمود التوازن. خربت )
عاد أنا وسوست كفرات القودير غاليه الحبه ب ٨٠٠ وشويه والكفرات لينه ومريحه ولا عليها كلام.
المهم قررت اوزن أذرعه ومقصات رحت لمحل بنشر عندهم ميزان وبحكم المحل قريب البيت قابلت اليماني وشرحتله ووريته مكان المسحيه عاد هو ناضر وقلب يمين ويسار ويناظر فوق وتحت بصراحه ما اعجبني المهم قالي خلاص بسيطه نسوي وزن وبتروح المهم الآن الساعه ١١ونص قالي خل السياره عندي وتعال بعد الصلاة طلعها على الميزان رحت وهذا غلط مني لأن المتابعه مهمه.
رجعتله بعد الصلاه قالي خلاص السياره تمام يابو يمن على ضمانتك قال أبد جرب وشوف.
طلعت فيها خط السياره ملعوب فيها تحذف يمين وفيها اهتزاز من قدام اذا تعديت ١٢٠ عاد الحين ارتفع ضغطي جاي أسوي مسحيه وتعدملي السياره.
رجعتله والعجراء في يدي والله ناويه لقيته يصلي وانا أهدي شوي خلص وطرت فيه مهاوش ومن هالكلام مسكت جوالي بأدق على الشرطة بصراحه شي يخليك تطلع من طورك تجمعو اخوياه وقالو أبشر نضبطها لك طلعها على الميزان وما يصير خاطرك الى طيب.
حتى شكل الميزان يجيب المرض والكمبيوتر مهتري وانا ورطت بس الله يعديها موتري جديد وكل شي فيه وكاله.
جلسو نص ساعه يمين يسار فوق تحت الين ما رفعو ضغطي بالاخير قالو خلاص الوزنيه تمام.
جربتها نسبياً رجعت ٨٥ ٪ قلت يا ولد آخذها برأسي وامشي قبل لا يفككو السياره كم حسابك قالي ٢٠٠ أعطيته ١٥٠ ناضر في وقال ماشي الضاهر يبي الفكه مني.
مشيت ورحت البيت مرتفع ضغطي والتفكير مع السياره.
بعد أسبوع شرحت القصه لواحد من زملائي في العمل وقالي تستاهل كيف تروح لهاذولى اغلبهم حقين بناشر ومتعلمين من بعضهم وما يعرفؤ لها الشغله حدهم غيار زيت وترصيص ودلني على محل متخصص في تبوووك شارع ٣٠ الله يجزاه خير
وصلت المحل في نفس الموقع الي حدده لي بصراحه محل راقي اجهزه جديده عمال سوريين وفلبين ويماني على الترصيص.
قلتلهم فين مدير وقالي الفلبيني هناك مدير يقصد الاداره.
قابلت واحد تركي شايب شكله المدير. شرحتله قصتي كامله ضحك وقالي اعط الخبز خبازه.
بيكلفك الوزن يا ابني ٣٠٠ وإذا فيه مشاكل راح أقولك بكل أمانه جهازي أمريكي وجديد وكل أجهزتنا جديده ما تخاف قلت تظمن الوزنيه قال اضمنها بس بشروط.
آخر الموضوع أعلمكم بشروطه والرجال صادق وفاهم.
المهم طلب الفلبيني وقاله جهز العده والجهاز وتكلم معه شويه انقليزي وقال توكلنا على الله
وقف على السياره وقال كملك ما سويت ترصيص قلتله ٨ شهور قال ما ينفع لازم ترصيص.
قلت تم ترصيص وفكو الكفرات في ثواني.
وترصيصهم جديد وشغل مرتب.
خلصو من الترصيص زهم الفلبيني وقال اوزن هواء الكفرات وسويلها برمجه.
ضبطها وخلصنا من الترصيص.
قالي استريح وأعط الفلبيني المفتاح طلعوها على الجهاز وركب البطاريات حقت الجهاز على الكفرات ماشاء الله شغله مرتب وجهازه جديد
جلس تحت يشيك على الجلد وعظلات السياره زهمني وقال انت سيارتك ماشاء الله باقي مسامير الوكالة ما انفتحت قلت داري وش العلم.
قالي كل شي تمام عدا مسامير عمود التوازن معطوبه روح جيب اثنين والوكاله قريبه رحت وأخذت ٢ جديده بحدود ١٢٠.
رجعتله حصلته فك القديمة أسرع من البرق ركبها وقلت شدها قال يا ابني لها وزنيه خاصه ما تنشد عشان تصير مع المطب لينه وما تخرب الجلد.
رجع للكمبيوتر وشغل وتحريك والفلبين شغالين. بصراحه لا يعلى عليهم.
بعد ساعه تقريباً قالي سيارتك جاهزه وعلى ضمانتي.
نزل السياره وقال يالله أشوفك متخوف نطلع سواء نجربها بصراحه رجعت أحسن من اول والله ماني مصدق هاذي سيارتي.
والله ما شاء الله تبارك الرحمن صار مسطره حتى اتعمد أشيل يدي عن الطاره وثابت لا يمين ولا يسار.
رجعنا للمحل قالي حسابك مع الترصيص وغيار مسمار عمود التوازن ووزن الجهاز ٤٥٠ ريال
بصراحه يستاهل اديته ٤٥٠ واعطاني فاتوره وقالي تعال أعلمك ايش الشروط والملاحضات الي تتلافاها عشان الوزنيه ما تخرب.
هي حاجه لو تلافيتها راح تطول معك الوزنيه والجلد والربلات ما تخرب وتبقى السياره متماسكه
طلعني برا على الشارع بصراحه استغربت.
قالي شايف هاذي قلت انت صاحي مافيه شي.
ضحك وقال غطاء الصرف الصحي الحديد الله يكرمكم قلت آيه قالي هذا ٩٠٪ يعطب الوزنيه شايف البروز ضربات السياره فيه ما تتحمل لازم يصير فيه ميلان والحديده قويه عشان كذا تدمر الوزنيه وكل شهر شهرين وانت فك ونزل واوزن حاول تتلافاها بقدر المستطاع.
عاد ياكثر فتحات الصرف الي أكلها الموتر والشوارع عندنا مليانه عد واغلط.
كلفني الشغل :
١٢٠ ريال مسامير عمود توازن
٤٥٠ شغل ترصيص مع تغيير مسامير عمود التوازن مع وزن السياره كمبيوتر.
المجموع ( ٥٧٠ ريال )
الملاحظات من التجربه :
١. قبل تفكر في تضبيط الوزنيه شيك على عضلات السياره الجلد وعمود التوازن الأمامي والخلفي وجلد المقصات تشييك كامل من الأمام .
٢. أستشير وشف من حولك وأخذ فكره عن المحل الي بتروحله وشف الأجهزة اذا جديده والعمال باين عليهم متخصصين توكل على الله.
٣. لا يهمك السعر بقدر انك تضبط الوزنيه لان خرابها شهرين بالكثير والموتر طالب كفرات .
٤. نصيحه ابعد ابعد ابعد عن الحفريات وغرف الصرف الصحي اعزكم الله بقدر المستطاع هي اكبر سبب في خراب الوزنيه تخرب كل شي حتى الجلد تعطبها.
( المحل في تبوك شارع ٣٠ الي يبي الوصف يراسلني خاص. )
هذا ما لدي وفقكم الله وسدد للخير خطاكم.
الصور :
١. شكل جهاز الوزن ولاحظ ألكيمرات على الجانبين.
٢. شكل مسمار عمود التوازن ولا يمكن وزنها كمبيوتر وهو معطوب.
٣. عاد هاذي غرف الصرف الصحي صارلي منها انفلوبيا رعب.
إبلاغ
الردود
0
0
الكفرات الممتلئة كل ما كان الجنط كبير يخف الضرر
الوقفه على لفه ممكن يسبب بتلف الجلد والمقصات
قبل 8 سنه و 6 شهر