التهاون في اصلاح طرمبة البنزين يحطك في مواقف سيئة احيانا

27 3

لايمكنك التصويت حتى الحصول على 20 نقطة على الأقل
إضغط هنا للإخفاء

naac 2 2722
قبل 9 سنه و 8 شهر

السلام عليكم

اليوم قبل صلاة العشاء كنت راجع من بنبان للرياض 
اول ما مسكت الطريق السريع شفت رجال واقف جنب الخط ومعه كشاف يأشر ويكبس 

طبعا الرجال حاول انه يلفت انتباه الناس بالكشاف

جيت وقفت عنده وواضح انه منهك جداً
الرجل وقف بيصلي المغرب وجا بيشغل وما اشتغل الموتر
يقول التانكي كان فيه الربع

ومعه عايلته وصراحة موقف سيء جداً

قلت له اتصلت بأمن الطرق ؟
قال اتصلت عليهم ولي الان ما يقارب ربع ساعة احتريهم وما جاني احد والموتر يدق سلف وما يشتغل
وكان فيه تفتفه من فترة بس قبل اوقف زادت حبتين !!

جبت شفاط ماء حق الجوالين كان معي في الصندوق وقربت موتري لموتره وفتحت تانكي البنزين وبديت اضخ
وانا كنت متوقع انه قاطع بنزين 

المهم اني حسبت أقل من ثلاث دقايق وقلت له هذا بيوصلك للرياض ان شاء الله
الرجال راح يدق سلف الا والموتر ما يجاوب 
يدق سلف بس ما يشتغل 

قلت الظاهر عندك مشكلة في دورة البنزين يا طرمبة يا صفاية يا بخاخات
قال ان السيارة لها حول الشهر فيها تفتفه وتقطيع 

المهم قلت له بسحبك لين بعد كبري القوات الخاصة لأقرب محطه 

أول ما نزّلت الواير الا واشوف سفتي أمن الطرق

جانا العسكري وسألنا عن المشكلة وقلت له السالفة
اتصل على سطحة وقال لي توكل على الله ماقصرت 

طبعا مشيت وقعدت افكر واقول ان الرجال هذا اهمل اصلاحات ممكن تكون تافهة ولكنها حطته في موقف
بايخ وتعطل حول النص ساعة في مقطعة لا محطات ولا شي ومعه بزرين وامهم 

والحمد لله على كل حال
وصراحة أمن الطرق فعلا اسم على مسمى جزاهم الله خير

ولولا الله ثم أمن الطرق ولا كان قعد لين يسوق له الله واحد يساعده

إبلاغ

الردود