ايهما افضل سكويا او يوكن لاني باشتري احدهم

شف مقارنت حسن كتبي بل يوتيوب اكتب حسن كتبي سكويا ويوكن وبيعلمك كل شي. وشف انت.  على حسب ذوقك واتمنى اني افدتك يل غالي. 

اليوكن 2014 ما يقارن بالسكويا لو تقارن يوكن 2015 أقول لك اليوكن أفضل

مقارنة سريعة

المكينة: سكويا 5.7 لتر 388 حصان 4 عواميد كام اليوكن 5.3 لتر 300 حصان عمود كام واحد
الدبلات : السكويا دبل و دفلوك اليوكن بدون دفلوك
الدفرنس الخلفي : السكويا محور حر (مقصات ) مريح في الخط متعب في البر اليوكن دفرنس كامل مريح في البر متعب في الخط
الداخلية : اليوكن أحلى حتى الطبلون السكويا قبيح شوي من داخل و بالذات عدادات السرعة
شاشة المعلومات : في اليوكن خيارتها متعددة من ضغط الكفرات و نسبة الزيت و وقت المكينة و عدد اللترات المصروفة و مدى الوقود السكويا قليلية جدا حرارة و أتجاهات في الاستاندرد أما الفل ما أدري والله
الحساسات : السكويا أمامية خلفية اليوكن خلفية فقط


أنا جربت يوكن 2005 و سكويا 2013

عزم السكويا و عزلة و تماسكة من الداخل أطلق من اليوكن بمئة مرة

انا جربت يوكن اجار على عدد شعر راسي من قراءة عداد واحد كيلو ل 100 الف كيلو 
السيارة جديدة روعة جدا تحس بالفخامة لين 50 الف كيلو وتبدأ الاصوات والاعطال بالظهور 

السيكويا ما جربتها لكن انصح تستاجر وتجرب يكون ممشاها قليل وتجرب ايضا سيارة لاحد اقاربك ممشاها كثير ووقتها تقارن
وعالبركة مقدما

خذ لك اكسبدشن اصرف منهم كلهم
السكويا مشكلتة قطع غيار غالي
اليوكن 14 صار شكلة قديم ونزل حالياً الشكل الجديد افضل من القديم بمراحل
لو قلت يوكن 2015 كان صح كل العلم بتقول خذ يوكن 2015

نصيحة مني لك لأمريكي طائح سوقه لو تروح للمعرض وتاخد يوكن اصفار بس لو تركب لوحاته ويصير باسمك وماتمشي في ولأ تشغلة اعرضة للبيع وشف كم يجيبلك تخسر فيه واجد نصيحة مني خذ سكويا وأبعد عن الأمريكي 

اسمحلي وش جاب الكنز للعنز 

تقارن اليووكن بالسيكويا 
السيكويا شكله غبي داخلي وخارجي وقطعة مهي متوفرة ﻷنه مو منتشر مافيه فخامة داخلية ومقاعدة مهي مريحة زي اليوكن 
ميزة السيكويا المكينة فقط ولو جبنا دينالي تفوق عليه في المكينة 

اتوكل على الله وخذ يوكن ولك حرية الاختيار

^^^^^^سؤال جربت السكويا؟
أنا مثلك كنت أقول هذا الكلام قبل...
ولكن جربت السيارة الصراحة كمكينة وعزم وتعشيقات القير ومكيف بارد والوسع أفضل من اليوكن...
ممكن الشكل الخارجي والداخي لصالح اليوكن...

عن تجربة السكويا أفضل من ناحية المكينة والوسع بس قطع غيارة أغلى شوي من اليوكن وهو أصلاً صناعة أمريكية، أما اليوكن من تجربة عملي ويعيش حتى لو تعدى العداد 200 ألف بس تسمع اصوات الأبواب يبيلك كل فترة تربيط، أما من الناحية الميكانيكية من استخداد مايطلب، بس عيبه المراتب الخلفية واقفة كأنك راكب شاص، وهذا إذا صارت السيارة استخدام عائلي بيتعبون
، أما إذا بتاخذ دينالي فعزم جبار، في الأخير تقييمي إذا كان تبي لعائلة أنصحك بالسكويا، أما كشخصي فلك الخيارين بس اليوكن شبابي أكثر من السكويا.

جزاكم الله خير والاسبوع القادم بمشيئة الله
 وتحديدا يوم الاحد ان الله احيانا باتجه ياوكالة ابو جميل
 او التوكيلات العالميه بحكم انه لازال متوفر عندهم اليوكن والتاهو 2014 بالوان محدوده
وسالت عن الاسعار اليوم وكانت كالتالي
يوكن موديل 2014كاميرا 139350 ريال والالوان موكا بني واللون الفضي
يوكن موديل 2014 من غير كاميرا 134400 ريال والالوان موكا بني واللون الفضي
تاهو موديل 2014 كاميرا 133000 ريال والالوان نفس السابق
تاهو موديل 2014 من غير كاميرا 128000 وهذا غير متوفر

سكويا موديل 2014 دبل 143000 ريال وجميع الالوان متوفره
سكويا موديل 2014 عادي بدون دبل 133000   ريال وجميع الالوان متوفره

اما من ناحية اسعار التاهو واليوكن 2015 فهي نار ومبالغ فيها ولا طرا لي اشتريها

واخيرا ماخاب من استشار ولا ندم من استخار

واشكر الاخوان اللي ردو

وننتظر مشورتكم يالغالين وتقبلوا تحياتي

ماجربتهم   كلهم
ولاكن   سكويا    تويوتا
بلا   امريكي    ابو  الاعطال

تويوتا   تمشي  وانت   مرتاح   بستر  الله   

استاجر يوكن وسكويا وتعرف الفرق

السيكويا عزم مو طبيعي ماشاء الله وهذا يرجع لقوة مكينته بس مرهق داخل المدن

اليوكن موتر رسمي وكفو بس يبي لك كل فتره تربيط

سواء شريت يوكن او السيكويا كلها مواتر حلوه 

وانصحك لما تروح للوكاله تطلب اختبار قياده

بيعطونك السياره تجربها وبعدين انت احكم وش اللي لك رغبه فيه

موفق

انا بقولك بصراحه السيكويا م جربته بسس عندي انا يوكون 2009 صراحه سياره عمليه اعتبرها مرره مخليها كانها اكسنت يرجال اطلع فيها 5 مشاوير ف اليوم م قد اشتكيت منها بسس انتبه من الحفر والمطبات 

بسس نصيحه لا تاخذ الفل لانو القطع تختلف اسعارها من الفل والاستاندر مثل المساعد الامامي حق الفل الواحد ب 1100 الاستاندر ب 400 لان الفل مساعد كهرباء والاستاندر مساعده عايدي

السيكويا مكينته ماكينة لكزس