هل بدأ البيع لليوكن 15 وإلا عرض فقط

الي اعرفه رحت للجميح ونازل ويقلون الحجوازت عليه بهبل  لكن موظف يقول اول دفعه لزم سعره شوي ناقز لكن بينزل الي اعرفه اسعارها نار 

الي اعرفه انه بدت الحجوزات وعشان الشكل جديد اكيد السعر مبالغ فيه مثل الجينيسيس اصبرله وبينزل، ،

نزل وياليته مانزل

قيمة اليوكن العادي ستاندر 183 الف والدبل 193 الف

ما ادري وش اللي يفرق عن موديله السابق

الموديل اللي قبله في صدام وهذا في صدام هذاك فيه 3 مراتب وهذا فيه 3 مراتب وهذاك فيه جنوط وهذا فيه جنوط

وش الفرق !!

الفرق التصميم فقط

يعني نفس القطع بس التصميم اختلف , يعني ما خلوا فيه 3 صدامات و 9 ابواب و كبوتين وشنطه ونص

نفس المكاين غيروا وضعيتها بدل ما تسوي الصدام بهالشكل خلوها تسوي بهالشكل

ما ادري ليه ينطوا بسعره فوق 50 الف ريال

جنان هو

يعني نقول 10 الاف عشان يمكن اضافوا اشياء بسيطه

لكن 50 الف ريال خير ان شاء الله

ترا احنا ما نشري الامريكي الا لانه هو المتوفر بالسوق بسعر رخيص

مدام وصل سعره لسعر اليابني والله لاطق لي بياباني وطز بالامريكي ان كان شافه نفسه

الجمس عام 2011 كان ب 126 الف ونط بعام 2014 اللي هو الان ب 140 الى 145 الف ريال ونفس الشكل والله لا زادوا قطعه ولا شيء بس غيروا موديل فقط

فرق كم 14 الف وهو نفسه بالتمام وكل ماله الطمع يزداد وشافت نفسها

يابوي ترانا كنا مجبورين نشتريك لان اسعار الاندكروزر وقتها كان 200 الف و هو كان ب 130 الف فرق كبير

لكن الحين مدامه وصل قيمه اللاندكروزر ووصل قيمة بطل الدروب باترول

تتوقعون وش بشتري

والله لاطق لي بباترول اس اي 2 من المعارض ب 194 الف نص فل فتحه سقف وشاشه و فخامه وعز كانه لكزس ومكينه مجنونه مع انها 320 حصان لكن مجنونه الله لا يضرها

يالله عاد ما بنطولها وهي قصيره

لكن توي اقتنع بالمثل اللي يقول ( الايه انقلبت )

اول كنا نقول لتويوتا ولكزس و نيسان خلوها تصدي والان انقلبت الايه وسار الامريكي يغار من الياباني وبدأ يتحداه بالاسعار الفلكيه

والان نقول للامريكي خلوها تصدي

الباترول والجكسار الزمن يشهد لهم مدام القيمه وصلت لكذا فطاح سوقك يالامريكي

والله الاسعار نار على قل سنع  اللي اشوف ان سعره مقبول نوعآ ما الباترول
ويشفعله قوة المكينه والفخامه ويعتبر غالي لكن هو الافضل 
والاندكروزر غالي اذكر شفت اعلان جي عاادي ب165الف استاندر مكيف واحد  سعر مبالغ فيه جدا
ياناس تعلموا المقاطعة وتنزل الاسعار  طبيعي الاسعار ترتفع بس مو لهدرجه الوكلاء عندنا فيهم 
طمع زايد 

طيب وش فيك معصب يا ابو يزيد الدنيا ما تستاهل 

لكن يستاهل قيمته صح 










امزح امزح  

قد قلت في موضوع ثاني .. 
في جيوب بنفس فئة الجمس أرخص واحسن واقوى وأريح .. 
تويوتا سيكويا .. 
فورد إكسبديشن .. 
نيسان ارمادا .. 
جيب قراند شيروكي .. 
دودج دورانقو .. 
مادام وصلت لـ 180 ألف ! .. 
اللاندكروزر والباترول لو مستعمل اطلق من مليون جمس 

ومعروف شكل السيارة يتغير اكيد سعره بكون غااالي 

شف الجينسس 

والسيرا اول ما نزل كان غاالي الحين نقص سعره 

هههههههههه يا شبح والله انهم فقعوا قلبي قسم بالله

كل شركة تغار

يقولون ليه هذولي اسعارهم كذا !! ليه ما نسوي مثلهم وماعليك بيجونا الزباين الرزق على ربك !! وهذاك يقول الله هذيك الشركه رفعت الاسعار , حتى انحم برفع

ويالله وكلها تعود سلبيات على المواطن و بعدها نزيد نطلع بهاشتاق جديد و الراتب ما يكفي الحاجه

والله لو يخلون راتبي 5 الاف ريال طول عمري بس انهم يرجعون كل شيء لسعره الاول بكون راضي

يارجال كل شيء سار غالي ما ادري وش بقا اللي ما غلي

تخيل الاندومي حتى هو زاد سعره

قسم بالله الشغله كلها مبزره وشغل حريم

كل واحد يغار من الثاني

الله يستر من الجاي

وفيه رد يقول ان سعر الجي ب 165 مكيف واحد

انا كنت بالمعارض

الجي اكس 2014 استاندر اتوماتيك خلفيه لكزس داخل بيج ب 155 الف خليجي في معرض بريده بالرياض

الجي اتوماتيك خلفيه لكزس داخل بيج ب 147 الف ريال

الجي استاندر عايدي خلفيه ابواب داخل اسود ب 144 الف

والباترول 2014 نص فل فتحه سقف و شاشه ومخمل ب 194 الف ريال

والجمس التاهو ب 173 الف واليوكن 183 الف استاندر , والدبل زياده 10 الاف وكلهم استاندر ما فيه اي زياده بس زياده دبل ب 10 الاف ريال !! معقوله كذا

علشان كذا اسألكم طلع نفس الفكره اللي براسي الجيب اطلق دام القيمه حول بعضها
الياباني (جيب) باترول واﻻ لاندكروزر اطلق مية درجه والحمدلله طلع تفكيرنا واحد ..

ابو يزيد حسب الي شفته ان اقل فئة تجي بحساسات + تشغيل عن بعد
وهي فئة LS

ابو يزيد الغالي جاي معصب شكلك هههههههه

ما ادري وش يحسون هالعالم بدا عليها حجوزات هايله والسعر غالي والله عالم غريبه 

اذا الناس مستعجلة والحجوزات بالهبل اكيد بيبقى السعر فوق وهذ من صالح الوكالات يمشون الموديلات 2014 لكن لو الناس تتريث وكل من شاف السيارة وسال عن السيارة وعطى الباب عرض اكتافه بيعرفون ان مافيه اقبال على الشراء بالاسعار الفلكية وراح ينزلون في الاسعار.
لكن شتقول في بعض الناس الي ماهمه السعر اذا يبقي يكون من اوائل المالكين للموديل الجديد حتى لو بالتقسيط او الايجار او الدين.

يبن الحلال يمكن يكون الكلام هاذا من موظفين الوكالة عشان يبين لك انه مرغوب وانك ماتلقى لك على قولتهم مطب رجل مع اني ما استبعدها من ربعنا اللهم لك الحمد عادي يطير نص راتبه على سيارة ومايصفى له آخر الشهر اي شي اهم شي السيارة

والله عقليات عندنا مدري وش تبي انا ودي اعرف وش فيها السيارة اللي ب 40 ولا ب50 ماطاف عليها 4 سنوات ونظيفة خاليه من العيوب ولله الحمد وتوديك لكل مكان ياخي فيه مستلزمات في الحياة الزم ولين قالوا قالوا الراتب مايكفي بلاكم ما عرفتوا تصرفونه يقصد لي 2750 على سيارة ويقول مايكفي طيب ليه كل هالمبالغ وخمس سنين انا مقحط على عمري ولا اقدر اسافر ودفعة اولى واخيرة واخرتها بعد سنة ولا سنة ونص يجيها دقشة وتكرهها وتبدا تجلدها جلد الووويل .... نااااااس غريبة

اخوي ابو يزيد تاهو ابتداء من 162 الف استاندر بدون دبل قصير  يوكن 172 استاندر بدون دبل قصير 

اول كم شهر يبون الناس الي عندها كاش وتبي تكون مميزة لازم السعر يكون غالي عشان يرضوا هذي الفئة من العملاء ويزيدوا الربح

بعد فترة بترجع الاسعار المناسبة لاغلب العملاء

خذ امثلة 
الايفوت اول ثلاث شهور سعره لايقل عن 3500 وبعد فترة 2600
جهاز البلايستيشن لايقل عن 2500 وبعد فترة بسيطة 1800

واعيد واكرر

كل سيارات شركة جي ام من الافيو للاسكاليد اسعار اول السنة تكون غالية جدا وتنزل طوال السنة على فترات

قريبي اخذ كاديلاك SRX اول السنز ب 210 وهو أخذه ب 185

الكابريس اول مانزل ب 98 الف وشريته بنفس السنة ب 84 الف


الي عنده دراهم زيادة يروح يشتري ولي أقساط يصبر 6-9 شهور وبياخذه بسعر حلو

يا اخوان الحجوزات هاذي من الناس الي عندهم فلوس ولا فكرو وكثير كذا بس لو يصير في تعاون ومحد بيشتري صدقوني بينزل سعره وبقوه 

اسعار تاهو ويوكن 2015 في السعودية إبتداءاً من 162,000 وحتى 286,000 - http://www.saudishift.com/2014/chevy-tahoe-and-gmc-yukon-prices-in-saudi-arabia/

يابو يزيد ،، وسبق قلت ذا الكلام لكن تعرضت للانتقاد من محبين هذي الفئة ،، السيارة وصلت لأسعار لاندكروزر و الباترول ،، وشتان فيما بينهم ،، في السابق كان الواحد يشري الجمس عشان راحته وقوته مقارنة بسعره والفارق الكبير في السعر بينه وبين لاند ،، اما الان لا تعليق ،، انا ما أمدح الاند ولا الباترول ،، لكنهم فئة اعلى بنفس السعر ،، وأخص الباترول بالمواصفات ،، وأقولها للمرة المليون سيارة بحدود ٢٠٠ الف ،، من دون مفتاح تشغيل ذكي ( البصمة ) ،، أساس المشكلة تكمن لدى المستهلك الضعيف ،، انا وأنتم ،، هذا والله اعلم