أضف سؤال أو موضوع جديد          

رد على موضوع المراتب المفصوله - الحل معها بارخص الاثمان ؟

up 19 down 8
ابو يزيد 000 8688
قبل 3 سنه و 6 شهر



السلام عليكم ورحمة الله وبركاته

كيفكم عساكم طيبين

الموضوع لي وكررته للفائده

ندخل في موضوع اليوم

موضوعنا اليوم عن المراتب المفصوله وبالذات المراتب الوسطى والاخيره ( للسيارات العائليه )

يوكن , تاهو , سوبربان , اكاديا , ترافرس , اكسبدشن , باترول فل كامل

بأتكلم عن الجموس

السياره العائليه تجي 3 صفوف مراتب , والفل كامل او وراد امريكا - يجي دايم منفصل

حنا ما علينا في الصف الامامي حق السايق والراكب , هذا بكيفه , لانه يجي بالسعودي والامريكي احيانا منفصل واحيانا متصل

احنا اللي يهمنا المراتب الخلفيه , لانها هي اللي بتشيل عوايلنا
_________________________

فالفل كامل او وراد امريكا يجي بالغالب المرتبه الخلفيه الوسطى فقط مفصوله

واحيانا تجي المرتبه الخلفيه الوسطى مفصوله + المرتبه الاخيره ايضا مفصوله

_________________________

وإحنا ما شاء الله عاويلنا يالله يالله تشيلهم السياره اذا كانت متصله , فما بالك ان كانت متصله

فعشان كذا , الواحد ما يشتري السياره بسبب ان المراتب مفصوله , والمشكله مو على كذا , المشكله انه حصلها بسعر ممتاز و نظيفه , ولكن عيبها مفصوله , فعشان كذا , قرر ما يشتريها , لانها ما تكفي عائلته , والسبب المرتبه :(

عموما , ابذكر لكم قصتي مع الدينالي , انا شريت الدينالي وطلعت مراتبه الوسطى فقط مفصوله , والاخيره الحمد لله متصله

طبعا انا عادي عندي , ولكن يوم اني اروح اخذ خالتي او عماتي او او , احسها ما تكفي , بس تشيل 2 بالوسط و 2 بالمرتبه الاخيره لان المرتبه الاخيره ضيقه , اجل ليش يا ابو يزيد شاري جمس ؟

وكثرت طلعاتنا احنا والاهل , من اسواق , وكشتات خفيفه بالدرعيه , ومثل كذا , وصراحه يتضايقون مره , لان الموتر ضيق ,والمشكله قصير بعد , يعني ان ما كفت الشنطه حقت السياره , يحطون الاغراض عندهم , وعاد تعال شف الزحمه , والمشكله الثانيه , بس انا الوحيد اللي اطلعهم واجيبهم , يعني انا سواقهم الخاص :) فعشان كذا قلت لازم اشوف حل

رحت دورت مرتبه وسطيه بالتشليح , وحصلتها من 1500 الى 2500 ريال , وحالتها من جيده الى جيده جدا , والبعض منها لازم تنجيد من جديد , والوانها بيج بالغالب ..

وايضا في مشكله ثانيه , انا مراتبي الوسطى , اقدر اسفطها بزر من عند السايق , عشان اذا كان احد بيركب بالمرتبه الخلفيه , ما يقعد يسفطها ولا يعرف لها , واقعد اقوله , من هنا ,لا لا , الزر هذاك , يارجال هذا هو عندك , وينبح صوتك وفي الاخير تنزل تسفط له المرتبه ,

ثاني مشكله , ان مراتبي الوسطى فيها تسخين , وهذا ميزه جميله , فلو ركبت مرتبه , بتروح علي خاصيه التسفيط + خاصيه التخسين

فاستفسرت بالمنتدى من عضويه ثانيه :) لعلي القى حل , والحمد لله واحد فزع لي برقم واحد في جده يقدر يشبكها لي , والمشكله اني انا بالرياض , لكن كنا ناوين نسافر جده بعد شهر , فحفظت رقمه عندي , ويوم رحت لجده , كلمته , وقال ايه اقدر اشبكها لك ,

طبعا هم اثنين , واحد قالي ب 500 ريال , والثاني قال 600 ريال ,

ورجعت كلمت ابو 500 ريال , وقلت للحبابيب بكم تجي , وقال ب 450 ريال , وقلت مافيه مشكله , بس هل عندك عينات اقدر اشوفها ,قال ايه , مرني و شف العينات اللي عندي , وان شاء الله الشغل يعجبك

قلت اوك , ومريته بالليل , ومحله عند المعارض بجده , رحت له وشفت شغله

يفك المرتبه اليسرى الخلفيه الوسطى , وفك الجلد عنها , و سارت المرتبه سفنج فقط , وشال السفنج , وسارت حديد فقط ,

ويروح لمحل الحداده حقهم , و يشبك وصلة حديد فيها من اليمين طبعا , عباره عن ترهيم وصله بالظهر و يرهم وصله للي تقعد عليها , طبعا مو مثل الوكاله , لا , عباره عن وصله صغيره مو كامله مثل الوكاله , وصله متوسطه , للظهر و وصله متوسطه للمقعد , وقلت له اكيد ما تنكسر لو احد سمين قعد عليها ؟؟ , قال لو 200 كيلو يقعد عليها , ما تنكسر , وقلت هل هي مريحه , قال ان شاء الله , المهم راح رهمها وجابها , و ركب السفنج على المرتبه و جاب سفنج زياده وركب السفنج على الوصله الجديده , وبعدين اخذ الجلد اللي فكه من على المرتبه , وفك الخياطه من الجنب الايمن وخيط جلد زياده فيه من الجنب , عشان الوصله , وبعدها ركب الجلد عليها , وطلعت مرتبه كامله ؟؟

والله وركبها بسيارتي وقعدت عليها , وطلعت كأنها حقت الوكاله , بس انها شوي قاسيه, بس عادي , مايهم , اهم شيء سارت متصله , وتفاوضت معه وعطاني اياه ب 400 ريال فقط :) وطبعا فيه التكيات حقت المراتب الوسطى قال تبغها , لان مالها فايده , وقلت عطني اياه , كيف ما ابغا , الا ابغها ونص , ورحت اخذتها وبعتها بالموقع هنا ب 100 ريال :) , وطلعت التكلفه يعني 300 ريال فقط :)

وشرايكم ذيب ههههه


طبعا سارت مرتبتي الوسطى الآن متصله

طيب وشي العيوب ؟؟

اولا : مافيها تكايه بالوسط , ( حقت الوكاله اذا كانت متصله يكون فيها تكايه )

ثانيا : اللون اللي خيطه مع الجلد حق الوكاله , كان ماهو اسود , كان كحلي غامق جدا جدا , طبعا اللي بيدقق بيلاحظ فسارت من الوسط تقريبا مختلف لونها لكن يمين ويسار لون اسود

طيب ومزاياها :

اولا : المرتبه يمين ويسار ما فقدت خاصيه التسخين , ( طبعا اللي بالوسط مافيها تسخين بس اليمين واليسار فيها تسخين )

ثانيا : اقدر اسفط المرتبه كهربائيه من عندي

ثالثا : سارت متصله وهذا اهم شيء :)

وهذي ارقامهم , وترا نسيت من هو ابو 500 وابو 600 , انتم دقوا عليهم , واسألوهم عن الاسعار , وراح تعرفوهم , وان شاء الله تكون الارقام صحيحه , ويكونوا موجودين , ما تكون الحكومه سفرتهم :(

لو الارقام طلعت خاطئه , فاكيد انها انفصلت , لكن موقعهم جده عند المعارض

راح تحصلهم هناك اكثر من محل

وبس حبيت افيدكم , وان شاء الله تكونوا استفدتوا

ملاحظه : المرتبه الاخيره يسويها ب 400 ريال , ومع المفاوضات يمكن تنزل الى 350 ويمكن 300
المرتبه الوسطى ب 500 , ومع المفاوضات يمكن تنزل الى 450 و يمكن الى 400 , على حسب الشخص , اذا كان ذيب مثلي يقدر ينزلها لل400 هههههه

وسيتم تنزيل صور للدينالي قبل وبعد

بتقولون كيف تعرف انها مرهمه , يعني كانت منفصله وسارت متصله ,
ج/ تعرف اذا مافيها تكايه


٠٥٤١٩٨٦٠٧٦اسماعيل 99% انه هو ابو 500


٠٥٦٥٨٩٩١٢٧ ابو سمير 99% ابو 600


تقبلوا تحياتي / اخوكم : ابو يزيد واعذروني على الاطاله














إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


جزاك الله خير لكن سؤال اخوي ابو يزيد الامريكي ولا السعودي كلها تجي مفصوله ال تي زد

طيب الدينالي نفس النظام ولا ؟


up 2 down 0
شيخ المعارض 2012 387
قبل 3 سنه و 6 شهر



هلا فيك يا الغالي

الفل كامل التي زد امريكي , في الغالب تجي مفصوله , ولكن يجي منها متصل

والفل كامل التي زد سعودي , في الغالب متصله , ولكن يجي منها منفصل

والدينالي كذلك

ولكن الامريكي هو اللي بالغالب يجي منفصل في كل انواعه والسعودي دايم يجي متصل في كل انواعه

لان الامريكان ماعندهم درزن من عيالهم ههههههههههه

الواحد يجيب ولد او ولدين وخلاص يقفل الانتاج ويقولون كفايه بزرين

اما عندنا تلقا الواحد معه حالته الماديه سيئه ولا عنده سياره كبيره وعنده 8 عيال

ويقول رزقهم على ربهم

اعرف ان رزقهم على ربهم ولكن وش تتوقع رزقهم مدامهم عايشين كذا !! تتوقع بيسروا اصحاب فلل وقصور !! , دايم الابن على اباه , فليه تعيشه هالحياه السيئه

عموما انا طلعت من الموضوع ولكن هذي ظظاهره صراحه سيئه والمفروض الواحد يكتفى بالكثير ب 3 الى 4 من ابنائه اذا حالته الماديه متوسطه عشان يضمن لهم مستقبل افضل




up 4 down 3
ابو يزيد 000 8688
قبل 3 سنه و 6 شهر



أبو يزيد

يعطيك العافيه 


up 1 down 0
ألو مرحبا 1886
قبل 3 سنه و 6 شهر



شغل 100 % واحلى لايك +1


up 2 down 0
Abu-Nawaf 336
قبل 3 سنه و 6 شهر



اخيراً نزلت موضوع وين مواضيعك من زمان 

وبالصراحة الموضوع شيق ومميز ومفيد 






up 1 down 0
hamodyaz 172
قبل 3 سنه و 6 شهر



ماشاء الله تبارك الله يعطيك خيره ويكفيك شره


up 1 down 0
عاشق الشفر 90 707 127
قبل 3 سنه و 6 شهر



اهلين اخوي
-(جزاك الله خير على الموضوع والتقرير الرائع واستمر يبطل لا توقف)
(وبصراحه من احلى الموضيع الي قراتها لانها بتفصيل(الممله)هههههههههههههه)
والله يعطيك العافيه وشكرااا لك


up 1 down 0
صديق المنتدى 364
قبل 3 سنه و 6 شهر



ماشاء الله شغل وكاله 
تبارك الله موتر صح لله يعطيك خيرها ويكفيك شرها


up 1 down 0
ابو خالد الناصري 477
قبل 3 سنه و 6 شهر



ابو يزيد م كأنك نزلت الموضوع قبل كذا؟!

ع العموم يعطيك العافية موضوعك جدا رائع واستمر حبيبي ف كتابة المواضيع لكن يريت لو تختصرها شوي :)

واعذرني ع الشطحهه ههههههههههه :)


up 1 down 0
واآحد 246
قبل 3 سنه و 6 شهر



ابو يزيد والله كذا شكلها غبي
اقصد العلامات حقت
الشنطه تراه رخيصه
الي يشوف سيارتك يقول اكييد جته صدمه من الخلف


up 0 down 0
ما يهزك الريح 147
قبل 3 سنه و 6 شهر



الكراسي الوسطى المنفصلة تسمى كراسي الكابتن (captain chairs) عادة تكون أريح , مقارنة بالمتصلة (bucket seat) أقل راحة وكلن تركب شخص زيادة .
ميزة و عيب لكل منها.


up 0 down 0
azizsan 15
قبل 3 سنه و 6 شهر



لاهننننننننننننننت يابو يزيد ع الموضوع اللي بيستفيد منه الكثير
تعجبني المواضيع الذكييييية 


up 0 down 0
تقووى الهجر 251
قبل 3 سنه و 6 شهر



ابو يزيد الزر حق صفط المراتب اقدر اركبه لموتري lt ؟!


up 0 down 0
رائـد الويباري -17
قبل 3 سنه و 5 شهر



اسال الله ان يجزيك عنا خير الجزاء يا ابو يزيد
موضوعك له اكثر من سنة ولا زلنا نستفيد منه حتى الان
الله يجعله في ميزان حسناتك


up 1 down 0
mhusain 1
قبل سنه و 10 شهر



ياسلام عليك كفيت ووفيت 
والفايدة تعم 


up 1 down 0
m7md198223 1
قبل سنه و 9 شهر



معاي اكسبلورر 2008 ايدي بور كونتة محتار ايش اسوي فيه 
الله يجزاك الجنة 


up 1 down 0
m7md198223 1
قبل سنه و 9 شهر