تجربتي بشراء الزجاج الخلفي لليوكون 2008 بعد ما انكسرت ..

19 0

لايمكنك التصويت حتى الحصول على 20 نقطة على الأقل
إضغط هنا للإخفاء

alarrak2001 60
قبل 12 سنه و 5 شهر

السلام عليكم ورحمة الله وبركاته


تعرضت سيارتي اليوكون 2008 لكسر فى الزجاج الخلفي
ورحت ادور لي بديل لها .. وطبعا اول ما قصدت الوكيل
وحقيقه تفاجأت بمدي الاستغفال اللي نتعرض له من اوكلاء وحتى السكراب
واليكم تجرتي ..


قلت فى البدايه خلني امر على الوكلاء اشوف الاسعار
وعقبها على الشركات الاخري للزجاج وعقبها للسكراب


ذهبت لوكيل جمس اللي هو بهبهاني وقالي سعرها قبل الخصم 135 دينار
وبعد الخصم 115 دينار .. ولما بققت عيوني وقمت انافخ
قالي وعلشانك 110 نهائي !!!!!!
ما ادري ( علشانك ) هذي من المحبه والا شكلي كسرت خاطره ..؟
وبمجرد قلت له : هذا آخر آخر .. قالي : 105 دينار
تصدقون حسيت اني اذا اغني له وارقص له يمكن اخذها منه البلاش ..!!
ههههههههههههههههههههههه
الوكلاء يعاملون الزبائن كالاطفال .. !! ليش ما تقول السعر النهائي وتسكت
لاااااااا .. لازم يلاعبك نفسيا ويخليك تتهيأ انك غلبته وضحكت على الشركه
واخذتها بسعر جدا نادر انهم يبيعونها فيه .. وهم والله اعلم رابحين الضعف


المهم طلعت منه ورحت لشركه الغانم وكيل الشفر تـاهو
وهو على فكره وكيل ماركه ايه سي ديلكو الامريكيه لقطع الغيار بالكويت
وعلى اعتبار ان اليوكون والتاهو اخوان ويتطابقون بكل القطع
وعقب ما طقطق بالكمبيوتر ( والشويتين بتوعه ) قالي السعر 80 دينار


!!!!!!!!!!!!!!! ؟ !!!!!!!!!!!!!!!!!1 ؟ !!!!!!!!!!!!!!


خقيقه صدمني .. نجحت اني اخفي صدمتي
من الفرق الكبير بينه وبين بهبهاني بالسعر اللي ما توقعته
وطبعا بدون علشانك ولا هم يحزنون ..
فقلت له سيارتي يوكون مو تاهو .. قالي نفس الشي ولا تفرق قيد انمله
( اتعب على قيد انمله هههههه )
وقالي بره المعرض سيارات تاهو ويوكون روح دقق وشوف اذا فيها فرق
واذا طلع فيها فرق تعال خذها ببلاش .. وقام وخلاني .. ( ثققققققه )
المهم طلعت وانا المع النظاره وناوي اصيد اى فرق بين السيارات
وفعلا .. نسخه طبق الاصل في كل شي .. حتى بدرجه التظليل الخفيف


طبعا لاااازم اسوي فيها ذكي .. وبدور ارخص منها
واكيد راح القاها بره باى شركه ارخص .. وبالسكراب ارخص وارخص


عندنا بالكويت اكبر شركه زجاج سيارات اسمها الرفاعي
ورحت للفرع اللي عندنا بصناعيه الفحيحيل ودخلت وفي بالي انها اكيد
بين 40 دينار الي الـ 50 دينار بالكثير
والله العظيم .. والله العظيم .. والله العظيم .. واشهد الله على كلامي
قالي بـ 120 دينار .. !!!!!!!!!!!!!!!
قلت له متأكد .. !! قالي بكل ثقه رووح رووح للشركه وشوف كم سعرها ؟
ابتسمت وقلت له عند جارك الوكيل الغانم عطانياها بـ 80 دينار
تعتقدون انها استحي او خجل او انحرج .. بكل بساطه قالي اشترها احسن لك


المهم .. طلعت منه وانا اقول كم واحد شربها والحمدلله الله نجاني منه
واتصلت على صديق لي ساكن بمنطقه الجهراء وشباك غرفة نومه يطل على السكراب
ههههههههههههههههههههههه
قلت له شوفلي كم سعر الزجاج الخلفي لليوكون في السكراب
وفعلا ماقصر وفر عليهم والافغانيه حقيقه يخافون الله
اقل واحد قاله 90 دينار بدون تركيب وبدون اى ملحقات معاها
مستعمله وبـ 90 دينار .. !! حسبنا الله وكفي


رجعت للغانم .. واشتغلت عليه آخر كم .. كم آخر .. ولا تزحزح بفلس
80 .. يعني 80 .. وتم الشراء والتركيب بأربع دنانير ولله الحمد


نصيحه يا اخوان .. اسأل كذا مكان قبل لا تشتري اى شي
وكاسر على قد ما تقدر .. وسامحوني على الاطاله
وبحفظ الرحمن

إبلاغ

الردود