لازم نشوف حل للمشكله هذه Xنصب وغش في مراكز الفحصX حياك الله

25 6

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 10 سنه و 6 شهر

السلام عليكم ورحمة الله وبركاته

كيفكم عساكم طيبين

انا ما ادري وش اقول لكم بخصوص العيد لكن ما اعرف غير اني اقول من العايدين والفايزين 

المهم هالموضوع يحتاج لنقاش وبقووووه

موضوع خطير سرنا ضحايا ورب الكعبه

الا وهو الفحص 

______________________________________

قبل فتره في واحد معه لكزس و شرطها من الصدام للصدام ما فيها رش ماعدا الرفرف الامامي يمين ويقول انا المالك 2 المالك 1 خالي أعتقد و بأسمه وكاله ماخذها

المهم واحد اتفق معه وراح فحصها عند البريدي وطلعت مرشوشه كامله 

وقال كيف مرشوش ؟ قال له اللي يشتغل بالمركز , إن اللون طلع رقمه كذا كذا يعني مرشوشه ولازم يكون كذا كذا عشان تكون ماهي مرشوشه , لكن للاسف سيارتك طلع رقمها كذا كذا يعني مرشوشه

و الحين الرجال منحرج اكثر من انه منصدم

 لان الشراي جاي من الكويت عشان هالسياره

المهم وقال الشراي : كيف تقول السياره ما فيها الا رفرف والحين طلعت مرشوشه كامله وتخليني اضرب مشوار من الكويت لهنا ؟

قال ما ادري علمي علمك , 

وكلم راعي المعرض وقال له صاحب المعرض , افحص عند كارتك وتأكد

راح الرجال وفحصها عند كارتك وطلع فعلا الرفرف فقط مرشوش ؟ وقال لهم السالفه ان السياره طلعت مرشوشه وكذا كذا ....ألخ

وقال له اللي يشتغل بمركز كارتك

هذي دايم تسير عند البريدي و فحص ثاني نسيت اسمه , ويطلع لهم ان السياره مرشوش كامله

المهم

البايع كلم الشراي وقاله اني فحصت عند كارتك وطلع لي ان الرفرف مرشوش فقط

وقال الشراي الناس تمدح البريدي والفحص الثاني نسيت اسمه وانا ما اقدر اثق الا بالفحصين هذي

ونقص بسومته فوق 40 الف اعتقد او 30 الف 

وقال راعي السياره انا بروح عشانك للوكاله , الوكاله تضمنها صح ولا لا ؟ لان الموتر لي ولخالي و قسم بالله ما جاه رش كامل 

وراح ودها للوكاله و دفع قيمه عاليه و فحصها بالكامل بالوكاله وطلع له الرفرف فقط فيه رش ؟

وكلم راعي السومه وقال تو اورقاها خلصت من الوكاله والرش بالرفرف فقط 

ولو تقولي بأخذها باعلى من سومتك الاولى ما ببيعك لانك كذبتني وصدقت الكلاب هذولي

وانا بس كلمتك عشان اوضح لك ان البريدي النصاب هذا ظلمني وانت صدقته ولا تأخذ فكره سيئه عننا يا السعوديين

_________________________________

السالفه 2 

انا رحت ابيع جمس الوالد , والله ياكان اخو الوكاله موديل 2004 , وما فيه عيوب ابدا ابداالمهم في واحد كلمني من تبوك وقال لي برسلك شخص من الرياض يشوف السياره ويفحصها وقلت حياه الله وحياك الله

جاني و سأل ناس ومدحوا له البريدي , وقلت له ترا البريدي ياخذ منك 500 والمراكز الثانيه ياخذون 300 ريال , وانا اضمن لك السياره لا رش ولا سمكره و ما فيه عيوب تونا مطلعينه من الصيانه , فاعتقد فحص كارتك او الحوت او مركز رخيص يكفي واوفر لك

وقال والله انا بافحصها بالبريدي عشان اريح الرجال اللي بتبوك وقلت براحتك

وراح فحصه وطلع له قطعه يحتاج لها تغير بالقير وقال اللي يشتغل بمركز البريدي , القطعه هذي قيمتها 2500 ريال 

قسم بالله يا وجهي سار مثل عجمه التمره من الفشيله 

كيف 2500 توضيب القير اقل من كذا

 و القير ما فيه الا العافيه والرجال جربها بنفسه

قال هذي قطعه مهمه بالقير ومدري ويش وتبخر الزيت ...الخ

طلعت من عنده وانا متشفل و كلم الرجال اللي بتبوك وقال له السالفه وقال الرجال هون والله يرزقنا ويرزقك

وانا قلت بنفسي اللي قال ان القطعه 2500 ريال من وجهه انه حرامي ورحت كلمت رفيق

هذا حبيب قلبي رفيق يشتغل بالورشه اللي دايم نسوي الصيانه فيها وقلت له اسم القطعه وقال ب 160 ريال مع التركيب

قلت صاحي انت ؟ قال ايش صديق ؟ قلت سلامت قلبك , بس ما ادري ما سمعت السعر ؟ وقال لي 160 ريال مع التركيب وقلت له اللي تركب بالقير وقال ايه ,

 قلت لا لا , عطني سعر نهائي انا زبون دايم يجي عندك وقال عشان انتا 140 ريال مع التركيب ما يقدر ينقص اكثر , وقلت طيب انا يمكن يجيب سياره يغير قطعه بكره اوك , اوك وقفلت


والرجال من جنبي سمع بكم سعر القطعه لكن كذبني , يحسبني شريطي و يحسب اني دقيت على واحد اعرفه وقالي سعر من راسه عشان اخليه يشتري السياره

وصدق الفحص لان كل الناس تمدحه

المهم الرجال بطل يشتري وراح

راح علي زبون + الزبون خسر 500 ريال حقت الفحص 

ورحت قلت للوالد السالفه قال هذا وصخ

يقعد يقول سعر القطعه كذا وكذا ويخلي سعرها طاير بالعجه

1 - عشان تنقص للزبون من قيمة السياره  واغلب الزباين شريطيه ويعرفوهم اصحاب الفحص
 عشان كذا يعلون قيمة الاصلاحات عشان تخصم للشريطيه من قيمة السياره

2 - ان كان الزبون ماهو شريطي , بيخليه يهون ويقول ما بشتري لان سعر القطعه عالي ويخوف
عشان يزيد الزبون هذا ياخذ سياره ثانيه ويفحصها عندهم من جديد ويكونون هم الكسبانين

وهذي شغلتهم عيال الحرام 


حتى كارتك ما اقول انه افضل واحد 

حتى هو به عيوب ولد عمتي معه يارس راح فحصها هناك وطلع له يبغالها كراسي مكينه  وشدد عليهم وقال افحصوا مره ثانيه ونتائج الفحص الثانيه طلعت انه يحتاج كراسي مكينه ووزن الكفر الخلفي لانه مايل وبواجي واشياء ثانيه
___________________

&&&& السألفه الثالثه وهي اللي خلتني اكتب هالموضوع&&&&

جيب مازدا 2013 كان معروض قبل 4 شهور

فيه صدمه من الزاويه الخلفيه ( ماهي خفيفه ) متوسطه
صدمه على الابواب اليسرى  ( ماهي خفيفه ) متوسطه

وامس أنعرض جيب مازاد للبيع ويقول انه فيه صدمه من الزاويه الخلفيه و صدمه على الابواب اليسرى

وعلى طول تذكرته , قلت هذا اللي كان معروض قبل 4 شهور

وانا مخزن صوره بلاب توبي 

ورحت ادور الصور بلاب توبي و الحمد لله حصلتها وكانت لوحته مكونه من 3 ارقام ( 993 )

ورحت اشوف الاعلان و لقيت انه مغطي لوحاته و لكن فيه صوره ما غطى لوحاته يوم كان فاتح الشنطه

و باينه اللوحه وهي مكونه من 3 ارقام ( 993 )

وخلاص ( قطعت الشك باليقين وعرفت ان هي السياره المصدومه )

لان الصدمه بنفس المكان + اللوح نفسها + الرجال حدد اماكن الصدمه وهي نفس الاماكن

جيت وفتحت السوم 75 الف

الا ويجي يرد صاحب السياره ويقول

ان السياره تم فحصها و طلع ما فيه رش او سمكره نهائيا ؟

وتم سومها ب 107 الاف و الحد 110 الاف ريال ؟؟؟؟؟؟؟؟؟؟؟؟؟


وين يا ابوي 

يعني انت تكذب نفسك وتصدق الفحص مع انك انت اللي صادم بها و مصلحها وتقول السياره ما فيها شيء على كلام الفحص

وبقدرت قادر , سار السوم ب 107

النظيف بدي وكاله ما فيه دقت شاكوش ينباع ب 107 الاف

وانت سيارتك مصدومه و مصلحه وتبغا فيها سعر النظيف وتقول السياره ما فيها شيء ؟؟؟

افا وانا اخوك إن كانك صدمت فيها و صلحتها , وبعد ما اظهرت لك نتائج الفحص ان السياره ما فيها شيء , رحت وقلت السياره ما فيها رش وانت عارف بنفسك ان السياره مصدومه ومصلحه 

وين الذمه يا غالي وين الضمير

لكن الطمع يا صاحبي خلاك تكذب على نفسك



كان يوم قالوا ان السياره ما فيها شيء , كان قلت لهم انا صادم فيها ومصلحها 

كيف السياره ما فيها شيء

فيه رش يمين من الزاويه الخلفيه ورش يسار على الابواب والصدمه ما هي خفيفه , الصدمه متسوطه

كيف ما طلعتوها لي

ولكن الطمع سيطر يا صديقي

وانا ما ادري وش نية الرجال لكن هو يعرف انه صدم فيها ومع ذلك صدق الفحص وقال ان السياره ما فيه شيء

وعلا سعرها و خلاه بسعر النظيف لان السياره سارت بودي وكاله

مع انه هو اللي صدام فيها ومصلحها بنفسه ومعه اوراق الاصلاحات :(



وانا بنزل لكم صور للسياره كانت عندي قبل الاصلاح وصور للسياره بعد الاصلاح مع وضع علامات على اللوح عشان تعرفون انها نفس السياره 

و نصيحه مني لكم 

والله سارت مراكز الفحص تخوف

واحد في سيارته رش رفرف طلع له الفحص ان سيارته مرشوشه كامل
وانا قالوا لي ان سعر القطعه ب 2500 ريال وطلعت بـ 140 ريال مع التركيب
وولد عمتي فحص مرتين وطلعت النتائج مختلفه
و راعي المازدا صدم فيه وصلحه وراح فحصها وطلع ان السياره ما فيها رش او سمكره ؟


والله سار في نصب وكذب عيني عينك في مراكز الفحص 

فاعتقد ان مالك الا الوكاله لتضمن حقك


يعني لا جيت تبيع سيارتك وهي نظيفه وعلى الشرط = يطلع لك بها عيوب ورشوش وهي ما فيه الا العافيه ( مثل اللكزس وجمس الوالد )


وان بغيت تشتري سياره وبتدفع دم قلبك فيها وتطلع نتائج الفحص وتقول ان السياره بودي وكاله لا رش ولا سمكره وهي مصدومه ومصلحه

 وتدفع دم قلبك فيها و في الاخير تنصدم ان السياره طلعت مصدومه ومصلحه  ( مثل جيب المازدا )

فالوكاله هي الحل الوحيد ليضمن حق البائع والشاري


وهذا رابط اعلان جيب المازدا بعد التصليح وفيه رده اللي يقول تم فحصها وطلعت مافيها شيء ورفع سعرها للسعر النظيف لانها سارت بودي بلد 

وهو عارف بنفسه انها مصدومه وانه بنفسه صلحها ومعه اوراق التصليح

لكن وش تبغاني اقول

http://haraj.com.sa/112901714/


وهذي الصور قبل الصدمه وبعد الصدمه وفيه علامات توضح ارقام اللوح

وياليت لايك عشان يكون الموضوع بالصداره ونوصل لأفضل حل 


تحياتي لكم حبايبي : محبكم ابو يزيد

إبلاغ

الردود