يوكن دينالي لؤلؤي و عيوبه ومميزاته واللي يبي يسأل يتفضل
![up](https://montada.haraj.com.sa/images/up.gif)
![down](https://montada.haraj.com.sa/images/down.gif)
إضغط هنا للإخفاء
الـــســـلام عـــلـــيـــكــم و رحـــمـــــة الله وبــركـــاتـــه
جمعه مباركه
أنا شريت يوكن دينالي 2009 ؛؛؛ 2009 الى 2013 نفس الشيء فقط الاختلاف بالموديل
طبعا راح أذكر لكم مميزاته وعيوبه
ومدري أبدأ بالمميزات او العيوب !!
خلونا نبدا بالمميزات
الامان : السياره فيها ارباقين بالطبلون + مكتوب بالسقف فوق كل شباك ( أرباق ) + على العامودين الاماميه و العامودين اللي بالوسط اللي بين شباك السايق و شباك خلف السايق
يعني فيه ارباقات طبلون و ستائر ارباقات و فيها ارباقات بالعواميد , ماشاء الله تبارك الله , امان بعد الله سبحانه
طبعا سيارتي وارد امريكا ما ادري عن السعودي
مكينته 6,2 لتر , والله قويه جدا جدا جدا , تجيب من 0 الى 100 في 6 ثواني تقريبا
وصوت المكينه جميل جدا جدا جدا , خصوصا لمن تدعس عليها , تحس إنك راكب سيارة سباق
شكلها من الخارج روعه , اللي صمم الدينالي رايق
طبعا يجي دبل مستمر ما فيه زر للدبل , الاربع كفرات تمشي وتفصل على 80 , يعني اللي يحاول يدرفت فيه ما يقدر ههههه
قطع غياره منتشره خارج الوكاله ونوعيات ممتازه ورخيصه
فحمات كامله ب 300 ريال و شمعات اصليه اماميه ب 65 للشمعه الوحده و الاسطب الخلفي نوعيه ممتازه صناعه تايوان ب 270 ريال و الشبك ب 600 ريال و الصدام الامامي ب 300 ريال والخلفي ب 600 ريال صناعات ممتازه ,
الكل يفهم فيه
الرساوه 10/10 امشي بالخط وافك الدركسون وانا ماشي 150 و ثابته بمحلها ما شاء الله تبارك الله
طبعا التصميم نفس اليوكن الفل كامل من الداخل ما عدا التخشيبه تختلف
يعني مراتب اماميه في تسخين وتبريد والوسطى فيها تسخين وتسفيط اتوماتيكي و الدركسون كهرباء , إذا طفيت السياره ارتفع لك , وان نزلت رجع , وإذا فتحت السياره ارتفع وان شغلتها نزل
حاولت اجربه بالمطر و ادخل منعطف حاد وانا ماشي بسرعه
زحفت على خفيف ورجعت بأسرع ما يمكن و ثبتت , يعني مانع الانزلاق فيها قوي
سافرت فيها سياره راسيه و ثابته في الخط و سريعه
___________________________________________
العيوب
السياره قاسيه مو مثل اليوكن والتاهو العادي
لان مساعداتها رياضيه
فقالوا لي غيرها بمساعدات تاهو عاديه وانا فضلت تكون حقت بلاده
من عند رجل السواق ورجل الراكب حرراه شديده , من شدة حجم المكينه ووسعها
فلا بد تشغل المكيف عند الارجل ولا بتعرق عليك بشده
الروايح من الخارج تدخل وقالوا لي , نقدر نسد مروحه وهي مالها فايده كبيره , وما سديتها
و نسبه العزل فيها 10/5 يقولون ان هذي ميزه وانا اعتبرها عيب لكن البعض يعتبرها ميزه , عشان تسمع صوت المكينه الجباره والشكمان من الخلف
وهي رياضيه أكثر من إنها تكون عائليه
يعني قاسيه عشانها رياضيه ونسبه العزل فيها قليله عشان تسمع صوت المحرك والشكمان والمكينه كبيره عشانها من النوع الرياضي
فأنا قررت ابيعه و اشتري لي تاهو او يوكن عادي واعدله دينالي إن كان يوكن او LTZ إن كان تاهو
وافكر بالتاهو اكثر لان مع ولد عمتي تاهو 2012 يطلع به ارصفه تقول إنه دعس كرتون ما طلع رصيف ويطلع المطبات بكل لين , انا كأني طالع هضبه مو رصيف لان المساعدات قاسيه جدا
والعزل فيه قوي جدا وصوت المسجل واضح , اما الدينالي ما تسمع الا السيارات بالخارج
يعني اللي يبي عائلي يأخذ عادي , اللي يبي رياضي ومكينه كبيره ومساعدات رياضيه و تسمع صوت المكينه بكل وضوح فخذ دينالي
كانت تجربه ممتعه مع الدينالي
واللي عنده سؤال فأنا تحت امرك , اسأل وراح تلقى الاجابه إن شاء الله
و لا تنسوا سورة الكهف يا شباب , نور ما بين الجمعتين
تقبلوا تحياتي اخوكم : ابو يزيد
![إبلاغ](https://montada.haraj.com.sa/images/alert.gif)
سيارات للبيع
الردود
من واقع تجربه
![up](https://montada.haraj.com.sa/images/up.gif)
![down](https://montada.haraj.com.sa/images/down.gif)
وابعد عن الدينالي والاسكاليد
قبل 4 سنه و 12 شهر