تجارة السيارات الامريكية .. هل تنصحوني بها ؟

والله اذا تترزق منها وفيها مكسب توكل على الله

تجارة مربحة إن شاء الله ، بس الله الله بالأمانة لتتبارك أموالك فورد - على سبيل المثال - تجيبه بــ 63.000 تقريبا ، ينباع بــ 75.000 ،،


والله يوفقك

تجارة السيارات المستورده حتى ترتاح لازم تعرف شخص تقه يشتري ويرسل لك

انا اعرف ناس يستوردو تريلات من الاردن ويبيعوها في تبوك بمكسب أقل شي 20 الف

بس ماتقدر تستورد الا سياره وحده بكل سنه بأسمك او بأسماء أفراد عائلتك او بالاتفاق مع معرض او صاله تقدر تسنورد اكثر من سياره

بالنسبة للسيارات الامريكيه فقصتها قصه

بالنسبه للسيارات النظيفه اللي في امريكا اقصد ( الاستخدام الشخصي ) سعرها اقل من هنا , بس مع الشحن والجمرك والمواصفات بتكون قريبة جدا من سعر السوق وتوصل اكثر , نادرا مابتلقى سيارات نظيفه ورخيصه وبتحصل من وراها ربح

اما اللي يجيبونها التجار عندنا فهذي مخلفات التأمين والحوادث والكوارث (طبعا ميزت امريكا ان السيارة اذا جاها شيء طاحت قيمتها السوقية ماهو عندنا اللي مقلوبه تلقاها بـ 60000 ريال وقيمة النظيف 85000 ريال , علشان كذا تلقى تجار الامريكي في سنة يجمع ثروة)

طيب بيقول واحد وتقرير الكارفكس , طبعا فيه تجار عرب وامريكان خونه وحراميه يروحون لشركة التأمين وياخذون سياراتها بالجمله قبل ماتدخل معلوماتها في هيئة السير والطرق الامريكيه , وشركة التأمين تعرف مقصدهم وعادي عندها لان همها الفلوس بس , وتقرير الكارفكس وغيره عبارة عن شركات ربحية تشتري المعلومات من هيئة السير الامريكيه وتبيعها على المستفيدين زينا احنا , بس السيارة اللي ماتدخل معلوماتها تبقى سليمة

ويصلحونها ويبدلون بديها وقطعها وينظفونها اذا هي غرقانه , وفي الاخير يقلبونها (clean title) ويبيعونها على تجارنا احنا واحنا نشتريها , ربما ان بعض تجارنا يعرفون بالشيء هذا وبعضهم مايدري ,

وياما سمعنا عن ان السيارات الامريكيه لازم تكون مصبوغه من امريكا (تنساق على المساكين), والا اللي اشترى سيارة والكارفكس سليم وفي الاخير عرف ان الشاص مطعوج , والا اللي فك طبلونها ولقى اثار الطين باقي والا اللي لذعت عليه الظفيرة كامله

للأسف السوق الخليجي خدم شركات التأمين بأمريكا خدمة العمر ولولا الله ثم احنا كان كل السيارات الامريكيه المسحوبه من التأمين بتروح سكراب حديد

طبعا في شواذ في القاعده هذي زي السيارات المسروقه والرجيع من الوكالات عندهم هذي مابتكون معدومه وبتلقاها نظيفه

المهم الله يوفقك ويكتبلك الحلال

كلامي هو خلاصة تجارب من ناس في الشغله هذي واصحاب لي من خارج المملكه وأدله امام عيني من بعض الاصدقاء وانت الحكم

فلوس مافيه 
الكار فاكس والاوتوشك ياخذون معلوماتهم من شركات التأمين بدرجه أولى والوكالات ومراكز الصيانة
والمرور وسلطات الولايات المحلية 

وفيه نقطه ثانية 
نظام استمارة السيارة في امريكا لابد من ذكر اي شي صار للسيارة 

مثلا اذا السيارة سليمه تحصل مكتوب Clear Title
اذا كانت مصلحه تحصل مكتوب Rebuilt

والنظام يفرض عليهم هذا الشي
حتى لو افترضنا ان فيه احد شرا سيارة مصدومه واوراقها سليمه وحب انه يتذاكى ويصلحها في امريكا راح يختم على
استمارتها بعبارة Rebuilt يعني مصلحة اوتوماتيكيا بمجرد ما ياخذ اذن الاصلاح منهم 

لكن كييف الشريطية يتلاعبون ؟؟
يشترون المصدوم من امريكا ويشحنونه للامارات ويصلحونها 
وبعد ما يصلحونها يسجلونها في الامارات بلوحات اماراتية خصوصي وبعدين يصدرونها للسعودية

بهالطريقة تدخل عادي جداً وتعامل معاملة السيارات القادمة من دول الخليج 
يعني سجلها السابق ينمحي وتصير مولوده من جديد

naac
^
كيف سجلها السابق ينمحي وهي اصلا مختوم الكارفاكس من امريكا (damaged ) ؟

^
^
^
انا اتكلم عن الجمارك 
الجمارك ما عليهم من الكارفاكس ولا الاوتوشك

الجمارك ينازظرون اوراق السيارة فقط

وان جت على التقرير بعض الشريطية هنا شغالين تزوير تقارير على الناس تحصلهم دايما يحطون صورة ورقية للتقرير
في درج الموتر ويطلعه للزبون على مود انه تقرير صحيح وهو مزور

ينازظرون = يناظرون

^^ والله خطيرين الشباب

ايوه تقولي !! وايش بعد ، ومنكم نستفيد

صحيح كلام 
naac 

قبل يومين طاحت عيوني علئ سياره من لمعتها قلت بس هذا المطلوب وهذا الموتر واروح يمه طلع الموتر امريكي قالو فيه رش كامل في امريكا قلت ياولد وش الحل الموتر عاجبني وإعطاني سعر خيالي قلت له تؤكلنا علئ الله وافحص وكل شيء سليم معا أن الإيرباقات طالعه بس قالي سليمه 
ورحنا يم المعرض إلا واحد من الشباب متصل علي يقولي وينك قلتله السالفه قالي أصبر لاتدفع ريال لين أجيك فاهم قلتله علئ أمرك 

المهم جاني خويي وصراحه له خبره في السيارات 
ركب ألسياره وقالي إرباقاته طالعه وفاصلين الحساسات والمبات ومبدله إرباقاته 
ويفتح الكبوت ويقولي الشاصي مفكوك من فوق ملحم من تحت بس من فوق شوف مقصوص شوف واضح 

أقسم بالله حسيت اني حمار بغيت أكل خابور مزبوط قالي ألسياره مرشوشه في الإمارات شوف الإمارات رشتهم من برا ويخلون اللي داخل ومن داخل يجئ أسود يقولي الكبوت تجاري وصناعه ابو كلب تايون أتوقع مع أنه اعطاني تقرير الكار فكس وشفت أنه سليم 100%100 بس في الإمارات متزبطه فهمني الطريقه ومسكت المصري سفلت فيه لين صار وجهه فرخه بالملوخيه أخذت عربوني وقيمة الفحص وتفلت عليهم بلساني لين تجمعو الشعب واللي في المعرض طلعو وطلعت وهونت وكل مالقيت سياره نشبت لخويي يروح معي 
ههههههههههههه فتح علئ نفسه باب 
بس والله يأكثر الخوابير في السوق 
والغشمان مثلي لازم ينتبهون حيل بس المشكله اللي ماعنده أحد يشوف معه 

الله يفككم يااأخوان من عيال الحرام وانتبهو من المعارض والشريطيه مو كلهم بس الأغلب والحذر زين وعليك تجيب لك واحد فاهم جدا في الأمور هذي وإلا بتتخوبر وبتنغبن 

السلام عليكم

ماشاءالله تبارك الله .. يعطيكم العافية على المعلومات القيمة

بالفعل فيه تجار عرب ملاعين اصل وفصل ما خافون ربهم .. اهم شي عندهم نظام ( الربحية ) وكيف تصل للعلى .. طبعا بسهر الليالي سكران طول الليل ومن بكرة يرقص بالزبون

انا قررت في نظامي الحالي ان المربح ما بين 1100 الى 1500 دولار يعني تظيف على قيمة السيارة ما يعادل 12 الى 15 الف ريال فقط شاملة كل شي باذن الله .. واجيب لك السيارة المطلوبة واحاول بعلاقاتي اضبط الجمرك اذا فيه مجال للخصم 
بخصوص التقارير ان شاءالله تعالى ان الي بيطلع لي المعلومات يكون ثقة وراح اكون وراه واستخرج تقرير من جهات اخرى عشا اضمن مصداقيته

اما بالنسبة للمربح مثل ما يقول الأخ الكريم (( فلوس ما فيه )) انا يعلم الله ما ادور مكسب 15 و 20 الف  .. يا اخي والله المسلمين ما عاد يحتملون الخساير .. ومهما كان  المسلم اخو المسلم لا يظلمة ولا يسلمة
وكل ما كان ربحك اقل ===> يكفي انك تكون محبوب عند الجميع والكل يذكرك بالخير وانا يهمني علاقتي مع الجميع 

الان في نظام  دفع جزء من المبلغ والباقي عند الوصول وهذا الأن في ايجاد حلول له خلال هذا الاسبوع باذن الله ومن بعدها احاول ابدأ بالطرق الصحيحة 
وطبعا ماراح ابدأ بشي الا بعد انهاء كافة الاجراءات وتكون فيه ثقة متبادلة وتكون الاوراق مكشوفة عند الجميع بدون لف ودوران 

دعواتكم يا اخوان وبأذن الله راح اعطيكم الاخبار اول بأول مع بداية العمل .. فما زالت الملفات والاوراق غير متكاملة والمعلومات متناثرة  
شوي بكتب قصيدة هههههه
ولنا لقاء أخر