الى متى يا الشريطية الى متى ؟
25
8
إضغط هنا للإخفاء
بسم الله الرحمن الرحيم
موضوعي يتكلم عن النصابين الملقبين بالشريطية :
اليوم اتصل علي عمي يبي يبيع سيارته جمس مخزن ما مشى الى 20 الف موديل 1991 لون احمر واسود
طبعا كان يبي دراهم لانه محتاج ولا ما كان باعه
قلت ابي اعرضه لك في معرض او على موضع حراج وانشاء بينباع
قال لا انا ابي ابيعه اليوم وفي رجال مجهز دراهمه وبيشتريه
قلت اجل اتكل على الله اذا اعطاك سعر طيب
في هذه الحالة الجمس يسوى فوق الثلاثين الف لانه يعتبر جديد ما مشى مخزن والله اعلم اذا احد مهتم في الجموس كم كان بيأخذه
بعد اربع ساعات يتصل علي عمي ويقول ابشرك بعته ولاكن ماا اعجبني سعره لان اللي سامه راعي معرض
طبعا الوقت كان عصر
قلت كم بعته ؟ قال ب 5000 ريال
بغيت اطلع عليه من السماعة
قلت له انا جاييك اللحين
واروح له واقوله تعال خلنا نرجعه من اللي شراه قبل ينقله ولا شيء
قال ليه
قلت جمسك يجيب اكثر لانه نظيف ومخزن
قال مشينا ويوم وصلنا للرجال في معرضه الا هو عارضه بسعر 70 الف ريال !!!
قلت يالحبيب الرجال يبي يرجع دراهمك لك لانك لعبت عليه ويبي موتره
قال ادفع فوقها 60 وشيله !
قلت لاني دافع 60 ولا 50 خذ دراهمك يالنصاب وعطنا المفتاح ولايكثر
قال الرجال هذا باعه انت وش دخلك
قال عمي انا ابي جمسي يرجع ما عاد ابي ابيعه خذ درهمك وعطني سيارتي
قال زدني فوقها و ساعتها بخليك تأخذه
قال كم قال 60 مثل ماقلت لك ولا اذلف انت و اللي معك
قلت لعمي خلي الأمور علي والله ما يمسي وموترك عنده
واتصل على صاحب لي في الشرطة وأقول ان الرجال سارق السيارة و مايبي يرجعها وهي بسم عمي
والله وما يقصر خويي يجي ومعه دورية و غصب الشريطي أنه يرجع الجمس و يأخذ دراهمه
_____________________
حبيت اذكرها بالتفصيل بس لان في البعض منكم الله يهديه يبيع سيارته برخص التراب و هو عارف انها تجيب اكثر
فالله يرحم والديك ياللي تبي تبيع قبل ما تنوي و تحط حدك انزل السوق ولا ادخل مواقع وشوف اسعار السيارات
وان شاء الله بتبيع بسعر انت ما كنت متوقعه
وهذا فقط للتحذير
ومو كل مرة تسلم الجرة اذا بعت و قلت راحت انا اظمن لك انها راحت بس انت ما راح ترتاح في بيعها
واهم شيء اذا تبي تبيع لشريطي خلك انت نفسك شريطي
( الله يرزقنا و اياكم الجنة ويبعد عنا هموم الدنيا و عذاب النار )
تحياتي للجميع ...
إبلاغ
الردود
يا اخوان العيب مو من الشريطيه المترزقة الله ، العيب في ما يسمونه محلات الفحص اللي كل واحد
فاتح له محل ونصب على عبادالله عيني عينك ، وإلا يأخذ من ٢٠٠ الى الف ريال على شان يرفع
السياره ويطالع فيها واذا كانت لشريطي يقولك مافيها شي واذا كانت لشخص عادي والمشتري
شريطي عقد يعذرب فيها ويهول كثير من الأمور على شان يبخسون السلعه ويكسرونها وهذه بمقابل
متفقين مع بعض فانتبهو منهم
0
0
انا لو اني مكانك كان ذبحته
لا شرطه ولا شي
قبل 10 سنه و 4 شهر